ಎಕ್ಸ್ಕ್ಯೂಸ್ ಮೀ ಖ್ಯಾತಿಯ ಸ್ಯಾಂಡಲ್ ವುಡ್ ನಟ ಸುನೀಲ್ ರಾವ್ ಮುಖ್ಯಪಾತ್ರದಲ್ಲಿ ನಟಿಸಿರುವ "ತುರ್ತು ನಿರ್ಗಮನ" ಚಿತ್ರದ ಟೀಸರ್ ಲಾಂಚ್ ಮತ್ತು ಸಾಂಗ್ ಪ್ರೊಜೆಕ್ಷನ್ ನಿನ್ನೆ ಸಂಜೆ 6:30ಕ್ಕೆ ರೇಣುಕಾಂಬ ಸ್ಟುಡಿಯೊದಲ್ಲಿ ಯಶಸ್ವಿಯಾಗಿ ನಡೆಯಿತು. ಈ ಸಿನಿಮಾದಲ್ಲಿ  ಸುನೀಲ್ ರವರು ಹಾಡಿರುವ "ಜೋರು ಜೋರಾಗಿ" ಎಂಬ ಹಾಡಿನ ಪ್ರೊಜೆಕ್ಷನ್ ಸಹ ನಡೆಯಿತು. 

ಇನ್ನು ಈ ಚಿತ್ರದ ಬಗ್ಗೆ ಮಾತನಾಡಿದ ಸುನಿಲ್ ರಾವ್, ಇದೊಂದು ಫ್ಯಾಂಟಸಿ ಡ್ರಾಮಾ ಪ್ರಕಾರದಲ್ಲಿ ಮೂಡಿ ಬಂದಿರುವ ಚಿತ್ರ. ತಾವು ಸಿನಿಮಾ ರಂಗಕ್ಕೆ ಹಿಂತಿರುಗುವ ಆಲೋಚನೆಯಲ್ಲಿದ್ದಾಗ ತಮ್ಮ ಎದುರಿಗೆ ಬಂದಿದ್ದು ತುರ್ತು ನಿರ್ಗಮನ. ಇಂತಹ ಸಿನಿಮಾಗಳು ನೋಡಲಿಕ್ಕೆ ಕಡಿಮೆ ಸಿಗುತ್ತಿವೆ ಹಾಗೂ ಇದೊಂದು ವಿಭಿನ್ನ ಕಥೆ ಎಂದು ಅನ್ನಿಸಿದ್ದರಿಂದ ಸಿನಿಮಾವನ್ನು ಒಪ್ಪಿಕೊಂಡೆ. ನಿರ್ದೇಶಕರ ಕಲ್ಪನೆಯಂತೆ ಫ್ಯಾಂಟಸಿ ಎಲಿಮೆಂಟ್ಸ್ ಗಳು ಚೆನ್ನಾಗಿ ಮೂಡಿ ಬಂದರೆ ಇದೊಂದು ಒಳ್ಳೆಯ ಸಿನಿಮಾ ಆಗುತ್ತದೆ ಅನ್ನಿಸಿತ್ತು, ಅಂತೆಯೇ  ಸಿನಿಮಾ ಮೋಡಿ ಬಂದಿದೆ ಎಂದು ಸುನಿಲ್ ಹೇಳಿದರು.
ಈ ಸಿನಿಮಾದ ಮೂಲಕ ಸುನಿಲ್ ರಾವ್ ಸಿನಿಮಾ ರಂಗಕ್ಕೆ ಕಂಬ್ಯಾಕ್ ಮಾಡುವ ಭರವಸೆಯನ್ನು ಹೊಂದಿರುವ ಬಗ್ಗೆಯೂ ಮಾತನಾಡಿದರು.

ತುರ್ತು ನಿರ್ಗಮನ ಸಿನಿಮಾ ಬಗ್ಗೆ ಮಾತನಾಡಿದ ನಿರ್ದೇಶಕ ಹೇಮಂತ್ ಕುಮಾರ್, ಜೀವನಕ್ಕೆ ತುರ್ತು ನಿರ್ಗಮನ ಇದ್ದರೆ ಜೀವನ ಹೇಗಿರಬಹುದು ಎಂಬ ಕಲ್ಪನೆಯ ಮೇರಿಗೆ ಈ ಚಿತ್ರಕಥೆಯನ್ನು ಹೆಣೆಯಲಾಗಿದೆ. ಈ ಚಿತ್ರದ ಮುಖ್ಯ ಪಾತ್ರವಾದ ವಿಕ್ರಮ್, ಜೀವನದ ಬಗ್ಗೆ ಆಲಸ್ಯ ಇರುವ  ಹಾಗೂ ಸೋಂಬೇರಿ ವ್ಯಕ್ತಿಯಾಗಿದ್ದು, ಈತನಿಗೆ ಕೇವಲ ಮೂರೇ ದಿನ ಬದುಕಲು ಅವಕಾಶವಿದ್ದಲ್ಲಿ ಅವನು ಯಾವ ರೀತಿ ಬದುಕುತ್ತಾನೆ ಎಂಬುದನ್ನು ಈ ಚಿತ್ರದಲ್ಲಿ ತೋರಿಸಲಾಗಿದೆ ಎಂದು ಹೇಳಿದರು. ಈ ಚಿತ್ರವನ್ನು ಮಾರ್ಚ್ ಮೊದಲ ವಾರ ರಿಲೀಸ್ ಮಾಡುವುದಾಗಿ ಸಹ ನಿರ್ದೇಶಕರು ತಿಳಿಸಿದರು.

ಇನ್ನು ಚಿತ್ರದಲ್ಲಿ ಕ್ಯಾಬ್ ಡ್ರೈವರ್ ಆಗಿ ಕಾಣಿಸಿಕೊಂಡಿರುವ ರಾಜ್ ಶೆಟ್ಟಿ ಅವರು ಸಿನಿಮಾ ಬಗ್ಗೆ ಮಾತನಾಡುತ್ತಾ, ಇಂತಹ ಸಿನಿಮಾಗಳು ಸಾಕಷ್ಟು ಬಂದಿದ್ದರೂ ಸಹ ಈ ಸಿನಿಮಾ ಬೇರೇ ಸಿನಿಮಾಗಳಿಗಿಂತ ವಿಭಿನ್ನ, ಇದರಲ್ಲಿ ಕೇವಲ ಪ್ಯಾಂಟಸಿ ಮಾತ್ರವಿಲ್ಲ, ಈ ಚಿತ್ರದ ಜೀವಾಳ ಭಾರತೀಯ ತತ್ತ್ವಗಳು, ಭಾರತೀಯ ಸಂಬಂಧಗಳು, ಇಲ್ಲಿಯವರ ಬದುಕು ಮತ್ತು ಸಾವಿನ ಬಗ್ಗೆ ಇರುವ ನಂಬಿಕೆಗಳನ್ನು ಹೊಂದಿದೆ ಎಂದು ಹೇಳಿದರು.