ಚಿಕ್ಕಮಗಳೂರು: ರಜೆಯ ಮೇಲೆ ಊರಿಗೆ ಬಂದಿದ್ದ ಸೈನಿಕ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿರುವ ಘಟನೆ ಚಿಕ್ಕಮಗಳೂರಿನ ಉದ್ದೇಬೋರನಹಳ್ಳಿ ಬಳಿ ನಡೆದಿದೆ. ಮೃತಪಟ್ಟು 20 ಗಂಟೆಗಳ ಬಳಿಕ ಯೋಧನ ಮೃತದೇಹ ಪತ್ತೆಯಾಗಿದೆ.
     2 ದಿನಗಳ ಹಿಂದೆ ತನ್ನ ಚಿಕ್ಕಪ್ಪನ ತಿಥಿಗೆ ಊರಿಗೆ ಬಂದಿದ್ದ ಚಿದಾನಂದ್ ಎಂಬ 27 ವರ್ಷದ ಯೋಧ ಮೃತಪಟ್ಟ ವ್ಯಕ್ತಿ. ಚಿಕ್ಕಮಗಳೂರು ತಾಲೂಕಿನ ಬಾಳೇನಹಳ್ಳಿ ಗ್ರಾಮದ ಚಿದಾನಂದ್ ಜಮ್ಮು-ಕಾಶ್ಮೀರದ ಶ್ರೀನಗರದಲ್ಲಿ ಸೇನೆಯಲ್ಲಿ ಉದ್ಯೋಗದಲ್ಲಿದ್ದರು. ಅವರು ಬುಧವಾರ ಬೈಕ್​ನಲ್ಲಿ ಬಾಳೇನಹಳ್ಳಿಗೆ ಹೋಗುವಾಗ ಅಪಘಾತ ಸಂಭವಿಸಿದೆ. ಸಂಜೆಯಾದರೂ ಅವರು ಮನೆಗೆ ಬಾರದಿದ್ದಾಗ ಮನೆಯವರು ಗಾಬರಿಯಾಗಿದ್ದರು.
     ಆದರೆ, ಚಿದಾನಂದ್ ಹೋಗುತ್ತಿದ್ದ ಬೈಕ್ ರಸ್ತೆ ಪಕ್ಕದ ಕಣಿವೆಗೆ ಉರುಳಿದ್ದರಿಂದ ಅವರು ಮೃತಪಟ್ಟಿರುವ ವಿಷಯ ರಸ್ತೆಯಲ್ಲಿ ಸಂಚರಿಸುವವರ ಗಮನಕ್ಕೂ ಬಂದಿರಲಿಲ್ಲ. ಅದಾಗಿ 20 ಗಂಟೆಗಳ ನಂತರ ಪೊಲೀಸ್ ನೆಟ್​ವರ್ಕ್​ ತನಿಖೆ ಬಳಿಕ ಯೋಧನ ಶವ ಪತ್ತೆಯಾಗಿದೆ. ಸಖರಾಯಪಟ್ಟಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.