ಬೆಂಗಳೂರು : ನವಿ- ನಿರ್ಮಿತಿ ಬ್ಯಾನರ್ ನಲ್ಲಿ, ನಟ -ನಿರ್ದೇಶಕ ವಿಕ್ರಂ ಸೂರಿ ನಿರ್ದೇಶನದ ಚೌಕಬಾರ ಚಿತ್ರದ ಮೊದಲ ಪೋಸ್ಟರ್ ಬಿಡುಗಡೆ ಗೊಂಡಿದೆ.

ಪವರ್ ಸ್ಟಾರ್ ಪುನೀತ್ ರಾಜಕುಮಾರ್ ಚಿತ್ರದ ಮೊದಲ ಪೋಸ್ಟರ್ ಬಿಡುಗಡೆಗೊಳಿಸಿ, ಚಿತ್ರತಂಡಕ್ಕೆ ಹೊಸ ಶಕ್ತಿ ತುಂಬಿದ್ದಾರೆ. ನಿರ್ದೇಶಕ  ವಿಕ್ರಂ ಸೂರಿಯವರ ನಿರ್ದೇಶನದ 2ನೇ ಚಿತ್ರ ಇದಾಗಿದ್ದು, 2017 ರಲ್ಲಿ  ತೆರೆಕಂಡ 'ಎಳೆಯರು ನಾವು ಗೆಳೆಯರು ' ಇವರ ನಿರ್ದೇಶನದ ಮೊದಲ ಚಿತ್ರ.

ಚೌಕಬಾರ ಇದೊಂದು ಕಾದಂಬರಿ ಆಧಾರಿತ ಚಿತ್ರವಾಗಿದೆ. ಪ್ರೀತಿ, ಸ್ನೇಹ, ಸಂಬಂಧಗಳ ಸುತ್ತ ಹಣೆದಿರುವ ನವಿರಾದ ಕಥೆ ತುಂಬಾ ಸುಂದರವಾಗಿ ಮೂಡಿಬಂದಿದೆ ಎಂದು  ನಿರ್ದೇಶಕ ವಿಕ್ರಂ ಅವರು ಹೇಳಿದ್ದಾರೆ. ಮತ್ತೊಂದು ವಿಶೇಷ ಏನೆಂದರೆ ಚಿತ್ರಕ್ಕೆ ಬಂಡವಾಳ ಹೂಡಿರುವುದು ವಿಕ್ರಂ ಸೂರಿ ಪತ್ನಿ ನಮಿತಾ ರಾವ್, ಜೊತೆಗೆ ನಮಿತಾ ಮುಖ್ಯ ಭೂಮಿಕೆಯಲ್ಲೂ ಕಾಣಿಸಿಕೊಂಡಿದ್ದಾರೆ. ದಂಪತಿಗಳ ಮೊದಲ  ಪ್ರಾಜೆಕ್ಟ್ ಗೆ  ಪುನೀತ್ ಶುಭ ಹಾರೈಸುವುದರ ಜೊತೆಗೆ ವಿಕ್ರಂ ಅವರ ಜೊತೆಗಿನ ವಡನಾಟವನ್ನ ನೆನಪಿಸಿ ಕೊಂಡರು. ಅದೇ ಸಂದರ್ಭದಲ್ಲಿ ನಟಿ ನಮಿತಾ ರಾವ್ ಅಣ್ಣಾವ್ರ ಮತ್ತು ಸೂರಿ ಕುಟುಂಬದ ಬಾಂದವ್ಯದ ಸವಿ ನೆನಪುಗಳನ್ನ ಮೆಲುಕು ಹಾಕಿದರು.

ಇನ್ನು ಸಿನಿಮಾದ ಬಗ್ಗೆ ಹೇಳಿದ ವಿಕ್ರಂ ಸೂರಿ " ಸಿನಿಮಾದಲ್ಲಿ 3 ಹಾಡುಗಳನ್ನ  ಬೆಂಗಳೂರು, ಕಾರವಾರ, ದಾಂಡೇಲಿ, ಮೈಸೂರು ಸುತ್ತ ಮುತ್ತ ಚಿತ್ರೀಸಿದ್ದೇವೆ, ಎಚ್  ಎಸ್. ವೆಂಕಟೇಶ್ ಮೂರ್ತಿ, ಬಿ.ಆರ್. ಲಕ್ಷ್ಮಣ ರಾವ್ ಜೊತೆಗೆ ನಾನು ಒಂದು ಹಾಡಿಗೆ ಸಾಹಿತ್ಯ ಬರೆದಿದ್ದೇನೆ. ಮಾರ್ಚ್ ಗೆ ಆಡಿಯೋ ರಿಲೀಸ್ ಮಾಡಲಿದ್ದೇವೆ " ಎಂದರು. ಚಿತ್ರದಲ್ಲಿ ವಿಹಾನ್ ಪ್ರಭಂಜನ್, ನಮಿತಾ ರಾವ್, ಕಾವ್ಯ ರಮೇಶ್, ಸುಜಯ್ ಹೆಗಡೆ, ಸಂಜಯ್ ಸೂರಿ, ಕೀರ್ತಿ ಬಾನು, ಶಶಿಧರ್ ಕೋಟೆ ಸೇರಿ ಹಲವು ಕಲಾವಿದರು ನಟಿಸಿದ್ದಾರೆ.

ವರದಿ : ಪ್ರೀತಿಕಾ ಹೆಗ್ಡೆ