ಮುಂಬೈನ ಧಾರಾವಿಯಲ್ಲಿ ಎರಡು ಕೋವಿಡ್–19 ಪ್ರಕರಣಗಳು ಪತ್ತೆಯಾಗಿವೆ. ಕೊರೊನಾ ಸೋಂಕಿನ ಲಕ್ಷಣ ಹೊಂದಿದ್ದ ಇಲ್ಲಿನ 46 ವರ್ಷದ ನಿವಾಸಿಯೊಬ್ಬರು ಬುಧವಾರ ರಾತ್ರಿ ಮೃತಪಟ್ಟಿದ್ದಾರೆ. ಗುರುವಾರ ಬೆಳಿಗ್ಗೆ ಮತ್ತೊಬ್ಬ ಮಹಿಳೆಗೆ ಸೋಂಕು ತಗುಲಿರುವುದು ದೃಢಪಟ್ಟಿದೆ. 52 ವರ್ಷದ ಈ ಮಹಿಳೆ ಬೃಹನ್ ಮುಂಬೈ ನಗರಪಾಲಿಕೆ ಉದ್ಯೋಗಿ. ಈ ಇಬ್ಬರು ವಿದೇಶ ಪ್ರಯಾಣ ಮಾಡಿದ ಯಾವ ವ್ಯಕ್ತಿಗಳನ್ನೂ ಸಂಪರ್ಕಿಸಿಲ್ಲ ಎಂಬುದನ್ನು ಪ್ರಾಥಮಿಕ ವರದಿಗಳು ದೃಢಪಡಿಸಿವೆ. ಈಗ ಮೃತಪಟ್ಟಿರುವ ವ್ಯಕ್ತಿ ವಾಸವಾಗಿದ್ದ ಅಪಾರ್ಟ್‌ಮೆಂಟ್‌ ಅನ್ನು ಸಂಪೂರ್ಣ ಲಾಕ್‌ಡೌನ್ ಮಾಡಲಾಗಿದೆ.

ಈ ಸಂಬಂಧ ವರದಿಗಳು ಬಿತ್ತರವಾಗುತ್ತಿದ್ದಂತೆಯೇ, ಇಡೀ ಧಾರಾವಿಯನ್ನು ಕ್ವಾರಂಟೈನ್‌ ಮಾಡಬೇಕು ಎಂದು ಮುಂಬೈವಾಸಿಗಳು ಟ್ವಿಟರ್‌ನಲ್ಲಿ ಅಭಿಯಾನ ಆರಂಭಿಸಿದ್ದಾರೆ.