ಹಿಮಾಚಲ ಪ್ರದೇಶ: ಇಲ್ಲಿನ ಗಂಗೋತ್ರಿ ಗ್ಲೇಡ್ಸ್‌ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಕರ್ನಾಟಕ 166 ರನ್​ಗೆ ಆಲೌಟ್ ಆಗಿತ್ತು. ಬಳಿಕ ತನ್ನ ಮೊದಲ ಇನ್ನಿಂಗ್ಸ್​ ಆರಂಭಿಸಿದ ಹಿಮಾಚಲ ಉತ್ತಮ ಆರಂಭ ಪಡೆದುಕೊಳ್ಳುವಲ್ಲಿ ಎಡವಿತಾದರು ಆಲ್ರೌಂಡರ್ ರಿಶಿ ಧವನ್ ಹಾಗೂ ಪ್ರಿಯಾಂನ್ಶು ಖಂಡೊರಿ ಅವರ ಆಟದ ನೆರವಿನಿಂದ ಮುನ್ನಡೆ ಸಾಧಿಸಿದೆ.ಪ್ರಿಯಾಂನ್ಶು 240 ಎಸೆತಗಳಲ್ಲಿ 8 ಬೌಂಡರಿಯೊಂದಿಗೆ 69 ರನ್ ಗಳಿಸಿ ಔಟ್ ಆದರು. ಇತ್ತ ಧವನ್ ತಂಡಕ್ಕೆ ಆಸರೆಯಾಗಿ ನಿಂತಿದ್ದು 96 ಎಸೆತಗಳಲ್ಲಿ 7 ಬೌಂಡರಿ, 3 ಸಿಕ್ಸರ್ ಬಾರಿಸಿ ಅಜೇಯ 72 ರನ್ ಗಳಿಸಿ ಮೂರನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ. ಇವರ ಜೊತೆ ಆಕಾಶ್ ವಸಿಷ್ಠ 18 ರನ್ ಗಳಿಸಿ ಕ್ರೀಸ್​ನಲ್ಲಿದ್ದಾರೆ.

ಎರಡನೇ ದಿನದಾಟದ ಅಂತ್ಯಕ್ಕೆ ಹಿ. ಪ್ರದೇಶ 7 ವಿಕೆಟ್ ಕಳೆದುಕೊಂಡು 235 ರನ್ ಕಲೆಹಾಕಿದೆ. 69 ರನ್​ಗಳ ಮುನ್ನಡೆ ಸಾಧಿಸಿದೆ. ಕರ್ನಾಟಕ ಪರ ವಿ. ಕೌಶಿಕ್ 3 ವಿಕೆಟ್ ಕಿತ್ತರೆ, ಪ್ರತೀಕ್ ಜೈನ್ 2, ಅಭಿಮನ್ಯು ಮಿಥುನ್ ಹಾಗೂ ಜಗದೀಶ್ ತಲಾ 1 ವಿಕೆಟ್ ಪಡೆದಿದ್ದಾರೆ.ಇದಕ್ಕೂ ಮೊದಲು ಬ್ಯಾಟ್ ಮಾಡಿದ್ದ ಕರ್ನಾಟಕ ತಂಡ ಅಭಿನಯ್ ಸಿಂಗ್ ಬೌಲಿಂಗ್ ದಾಳಿಗೆ ತತ್ತರಿಸಿ ಹೋಯಿತು. ನಾಯಕ ಕರುಣ್ ನಾಯರ್ 81 ರನ್ ಗಳಿಸಿದ್ದು ಬಿಟ್ಟರೆ, ಶ್ರೇಯಸ್ ಗೋಪಾಲ್ 27 ರನ್ ಬಾರಿಸಿದ್ದೇ ಹೆಚ್ಚಾಗಿತ್ತು. ರಾಜ್ಯ ತಂಡ 67.2 ಓವರ್​ನಲ್ಲಿ 166 ರನ್​ಗೆ ಆಲೌಟ್ ಆಗಿತ್ತು.