-ಅಭಿಜ್ಞಾ.ಕೆ
ಜನವರಿ 31 ರಂದು ಮಲ್ಲೇಶ್ವರಂನಲ್ಲಿರುವ ರೇಣುಕಾಂಬ ಸ್ಟುಡಿಯೋದಲ್ಲಿ 'ಮಾನ' ಸಿನಿಮಾದ ಟೀಸರ್ ಬಿಡುಗಡೆಗೊಂಡಿತು. ನಟ ದೇವರಾಜ್ ಅವರ ಮಗ ನಟ ಪ್ರಜ್ವಲ್ ದೇವರಾಜ್ ರವರು ಟೀಸರ್ ಅನ್ನು ಬಿಡುಗಡೆ ಮಾಡಿದರು.  

ಪ್ರಖ್ಯಾತ ಸಾಹಿತಿ ಕುಂ.ವೀರಭದ್ರಪ್ಪನವರು ಬರೆದ ಕಥೆಯಾಧಾರಿತ ಚಿತ್ರವಾಗಿದ್ದು, ಸುಮಾರು  1970 ರ ದಶಕದಲ್ಲಿ ನಡೆದ ಘಟನೆಯಾಧಾರಿತವಾಗಿದೆ. ಮೂರು ದಶಕಗಳಿಂದ ಕನ್ನಡ ಚಲನಚಿತ್ರಗಳನ್ನು ನಿರ್ಮಿಸಿ ನಿರ್ದೇಶಿಸುತ್ತಿರುವ ಅಲ್ ಫ್ಲಿಕ್ಸ್ ಸ್ಟುಡಿಯೋದ ಮಾಲಿಕರಾದ ಸೆಬಸ್ಟಿನ್ ಡೇವಿಡ್ ರವರು ಈ ಚಿತ್ರಕ್ಕೆ ಆಕ್ಷನ್‌ ಕಟ್‌ ಹೇಳಿದ್ದಾರೆ.

ಚಿತ್ರವನ್ನು ಆ ಕಾಲದ ಪರಿಸರ ಹಾಗು ಸೊಬಗನ್ನು ಹೊಂದಿರುವ ಹಳ್ಳಿಗಳಲ್ಲಿ ಚಿತ್ರೀಕರಿಸಲಾಗಿದೆ.ಈ ಚಿತ್ರದ ನಾಯಕ ಜೀತದ ಬೇಡಿಗೆ ಸಿಕ್ಕಿಬಿದ್ದಿದ್ದರೂ  ತನ್ನ ಕನಸುಗಳನ್ನು  ನನಸು ಮಾಡಿಕೊಳ್ಳಲು ಪರದಾಡುತ್ತಾರೆ. ಹಳ್ಳಿಯ ಗೌಡ ಮತ್ತು ಇತರ ಪ್ರಭಾವಿತರಿಂದ ಶೋಷಣಿಗೆ ಗುರಿಯಾಗಿ ಜೀವನದಲ್ಲಿ ನೂರೆಂಟು ಅಡೆತಡೆಗಳನ್ನು ಎದುರಿಸುತ್ತಾನೆ.  ಇದರ ಜೊತೆಗೆ ಸಂಸಾರದ ಭಾರ, ಇವೆಲ್ಲವನ್ನು ಸಹಿಸಿ ಕಷ್ಟಪಟ್ಟು ನಾಯಕ ತನ್ನ ಕನಸನ್ನು ನನಸು ಮಾಡಿಕೊಳ್ಳಲು ಸಾಧ್ಯವೇ ಅಥವಾ ಇಲ್ಲವೇ?  ಮಾನವೇ ಇಲ್ಲದ ಪ್ರಭಾವಿಗಳ ಶೋಷಣೆಗಳನ್ನು ಮೀರಿ ನಿಂತು ಉತ್ತರ ನೀಡಿ ಹೇಗೆ ತನ್ನ ಮಾನವನ್ನು ಉಳಿಸಿಕೊಳ್ಳುತ್ತಾನೆ? ಎಂಬುದೇ ಈ ಚಿತ್ರದ ಕಥಾಹಂದರ.

ಟೀಸರನ್ನು ವೀಕ್ಷಿಸಿದ ನಟ ಡೈನಮಿಕ್ ಸ್ಟಾರ್ ದೇವರಾಜ್ ರವರು "ಇದೊಂದು ವಿಭಿನ್ನವಾದ ಸಿನಿಮಾ, ಈ ಸಿನಿಮಾದಲ್ಲಿ ನಾನು ಅಪರೂಪದ ಪಾತ್ರ ವಹಿಸಿದ್ದೇನೆ. ನನ್ನನ್ನು ಪೋಲಿಸ್ ಪಾತ್ರ, ಖಡಕ್ ಪಾತ್ರದಲ್ಲಿ ನೋಡಿರುವ ಅಭಿಮಾನಿಗಳಿಗೆ ಈ ಸಿನಿಮಾದ ಪಾತ್ರ ಒಂದು ಹೊಸ ರೀತಿಯ ಅನುಭವ ನೀಡಲಿದೆ" ಎಂದು ಪ್ರತಿಕ್ರಿಯಿಸಿದರು.

ಚಿತ್ರದ ಮುಖ್ಯಪಾತ್ರದಲ್ಲಿ ನಟ ದೇವರಾಜ್, ನಟಿ ಉಮಾಶ್ರೀ, ಶ್ರೀನಿವಾಸ್ ಪ್ರಭು, ಸರಿಗಮ ವಿಜಿ, ಹರಿಣಿ, ಮೂಗು ಸುರೇಶ್ ಹಾಗು ಮುಂತಾದವರು ಕಾಣಿಸಿಕೊಂಡಿದ್ದಾರೆ. ಟೀಸರ್ ಬಿಡುಗಡೆ ಸಂದರ್ಭದಲ್ಲಿ ನಿರ್ಮಾಪಕರಾದ ಕಾಂತಲಕ್ಷ್ಮಿ ರಮೇಶ್ ಬಾಬು, ನಿರ್ದೇಶಕ ಸೆಬಸ್ಟಿನ್ ಡೇವಿಡ್, ಮಹರ್ಷಿ ಆನಂದ ಗುರೂಜಿ, ನಟಿ ಉಮಾಶ್ರೀ ಮುಂತಾದವರು ಉಪಸ್ಥಿತರಿದ್ದರು.