ಜನೆವರಿ 26ರಂದು ನವದೆಹಲಿಯಲ್ಲಿ ರೈತರು ನಡೆಸಿದ ಟ್ರ್ಯಾಕ್ಟರ್ ರ್ಯಾಲಿ ವೇಳೆ ಕೆಂಪುಕೋಟೆಯಲ್ಲಿ ಸಂಭವಿಸಿದ ಹಿಂಸಾಚಾರ ಪ್ರಕರಣ ಸಂಬಂಧ ಪಂಜಾಬಿನ ನಟ ದೀಪ ಸಿಧುರನ್ನು ಪೊಲೀಸರು ಮಂಗಳವಾರ ಬಂಧಿಸಿದ್ದಾರೆ. ಕೋರ್ಟ್ ಅವರನ್ನು ಏಳು ದಿನ ಪೊಲೀಸರ ವಶಕ್ಕೆ ಒಪ್ಪಿಸಿದೆ. ದೀಪ್ ಸಿಧುವನ್ನು ಹರಿಯಾಣದ ಕರ್ನಾಲ್ ಜಿಲ್ಲೆಯಲ್ಲಿ ಬಂಧಿಸಲಾಗಿದೆ. ಇವನು ಪೊಲೀಸರ ಭೀತಿಯಿಂದ ತಾನು ಇರುವ ಸ್ಥಳವನ್ನು ಪದೇಪದೇ ಬದಲಿಸುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ದೀಪ ಸಿಧು ಮತ್ತು ಇತರ ಮೂವರ ಬಗ್ಗೆ ಸುಳಿವು ನೀಡಿದವರಿಗೆ 1 ಲಕ್ಷ ಬಹುಮಾನ ನೀಡುವುದಾಗಿ ಪೊಲೀಸರು ಘೋಷಿಸಿದ್ದರು. ರ್ಯಾಲಿಯ ಮಾರ್ಗ ಬದಲಿಸಲು ಮತ್ತು ಗಲಭೆ ಪ್ರಚೋದನೆ ಹಾಗೂ ಕೆಂಪುಕೋಟೆಯಲ್ಲಿ ಸಿಖ್ಖರ ಧಾರ್ಮಿಕ ಬಾವುಟ ಹಾರಿಸಲು ಕುಮ್ಮಕ್ಕು  ನೀಡಿರುವ ಆರೋಪದ ಮೇಲೆ ಪೊಲೀಸರ ವಶದಲ್ಲಿದ್ದಾನೆ.